Jo ho chuka he jo hoga huzur jante he

 جو ہو چکا ہے جو ہو گاحضورﷺجانتے ہیں

تیری عطا سے خدایا حضورﷺجانتے ہیں

خدا کو دیکھا نہیں اور ایک مان لیا 

کہ جانتے تھے صحابہ حضورﷺجانتے ہیں

منافقوں کا عقیدہ وہ غیب دان نہیں 

اور صحابیوں کا عقیدہ حضورﷺجانتے ہیں

اے علمِ غیب کے منکر خدا کو دیکھا ہے ۔۔۔۔۔۔؟

تجھے بھی کہنا پڑے گا حضورﷺجانتے ہیں

خبر بھی ہے کہ خبر سب کی ہے انہیں کب سے 

کہ جب نہ اب تھا نہ کب تھا حضورﷺجانتے ہیں

ہے اُن کے ہاتھ میں کیا کیا تجھے خبر نہ مجھے

خُدا نے کتنا نوازا حضورﷺجانتے ہیں

وہ مومنوں کی تو جانوں سے بھی قریب ہوئے

کہاں سے کس نے پُکارا حضورﷺجانتے ہیں

اسی لئے تو سُلایا ہے اپنے پہلو میں

کہ یارِغار کا رُتبہ حضورﷺجانتے ہیں

عُمرنے تَن سے جُدا کر دیا تھا سر جسکا 

وہ اپنا ہے کہ پرایا حضورﷺجانتے ہیں

نبی ﷺکا فیصلہ نہ مان کر وہ جاں سے گیا

مِزاج عُمر کا ہے کیسا حضورﷺجانتے ہیں

وہی ہیں پیکرِ شرم و حیا ذالنورین

مقام اُن کی حیا کا حضورﷺجانتے ہیں

ہیں جس کے مولا حضور اُس کے ہیں علی مولا 

ابو تُراب کا رتبہ حضورﷺجانتے ہیں 

یہ خود شہید ہیں بیٹے نواسے پوتے شہید

علی کی شانِ یگانہ حضورﷺجانتے ہیں

میں اُن کی بات کروں یہ نہیں میری اوقات 

کہ شانِ فاطمہ زَہرہ حضورﷺجانتے ہیں

جناں میں کون ہیں سردار نوجوانوں کے

حسن حُسین کا نانا حضورﷺجانتے ہیں

ملائکہ نے کیا یوں تو سجدہ آدم 

دراصل کس کو تھا سجدہ حضورﷺجانتے ہیں

کہاں مریں گے ابوجہل و عتبہ و شیبہ

کہ جنگ بدر کا نقشہ حضورﷺجانتے ہیں

وہ کتنا فاصلہ تھا اور کلام تھا کیسا

" اَو اَدنٰی " اور " مَا اَوحٰی " حضورﷺجانتے ہیں

ملے تھے راہ میں نو بار کس لئے موسیٰ

یہ دیدِ حق کا بہانہ حضورﷺجانتے ہیں

میں چُپ کھڑا ہوں مباجہ ہوں سر جھکائے ہوئے

سنائوں کیسے فسانہ حضورﷺجانتے ہیں

چُھپا رہیں ہیں لگاتارمیرے عیبوں کو 

میں کس قدر ہوں کمینہ حضورﷺجانتے ہیں

خدا ہی جانے عُبید اُن کو ہے پتا کیا کیا

ہمیں پتا ہے بس اتنا حضورﷺجانتے ہیں

نہیں ہے زادِ سفر پاس جن غلاموں کے

اُنہیں بھی در پہ بلُانا حضورﷺجانتے ہیں

حرم میں اونٹ نے چڑیوں نے کی یہی فریاد

کہ اُن کے غم کا مداوا حضورﷺجانتے ہیں

حدودِ دائرہ سدرہ حضورﷺجانتے ہیں

تیری عطا سے خدایا حضورﷺجانتے ہیں

الصلوة والسلام علیک یا رسول اللہ 

وعلی الک واصحابک یا حبیب اللہ